Kristjana Mjöll Jónsdóttir Hjörvar

Ég hef verið virk í verkalýðshreyfingunni síðan árið 2019, þegar ég tók fyrst sæti í stjórn. Síðustu tvö árin hef ég starfað að stofnun Visku, sem tók formlega til starfa 1. janúar 2024 eftir sameiningu þriggja stéttarfélaga. Í sameiningaferlinu og á þessu fyrsta starfsári félagsins var mitt helsta markmið að búa til öflugt stéttarfélag sem veitir framúrskarandi þjónustu og hefur slagkraft til að berjast fyrir réttindum félagsfólks.

Við megum svo sannarlega vera stolt af félaginu sem við sköpuðum saman. Viska er í dag eitt af stærstu stéttarfélögum landsins og við höfum byggt upp skrifstofu félagsins svo hún sé í stakk búin til að takast á við áskoranir næstu ára.

Á þessum tveimur árum sem ég hef unnið að sameiningu og stofnun Visku hef ég ávallt haft það að leiðarljósi að félagið vinni að því að styrkja stöðu háskólamenntaðra sérfræðinga sem raðast lágt í launatöflum hins opinbera þar sem störf þeirra eru ekki metin að verðleikum. Þetta eru sérfræðingar sem starfa víðsvegar í samfélaginu, en þó sérstaklega í menningar- og menntastofnunum og í heilbrigðisstofnunum.

Það er staðreynd að þó einstaklingur hafi aflað sér háskólamenntunar, þá birtist ávöxtur þeirrar menntunar ekki alltaf í launaumslaginu. Margir sérfræðingar í okkar röðum raðast lágt í launatöflum hins opinbera og eygja oft fá tækifæri til að breyta sinni stöðu. Laun þeirra raðast eftir starfsmatskerfum og stofnanasamningum þar sem virði starfa þeirra er skekkt og sú sérfræðikunnátta sem þau leggja til í starfi sínu er ekki metin að verðleikum.

Viska þarf að beita sér fyrir því að bæta umhverfi þeirra og vekja athygli á mikilvægi starfa þeirra úti í samfélaginu, ekki aðeins í samtali við launagreiðendur heldur einnig með öflugri hagsmunagæslu og virkri þátttöku í samfélagsumræðunni.

Félagsfólk Visku samþykkti kjarasamninga árið 2024 sem munu gilda í fjögur ár eða til ársins 2028. Þetta er tími sem stjórn Visku þarf að nýta vel. Tryggja þarf eftirfylgni með bókunum í þeim samningum og halda samtalinu virku við launagreiðendur. Jafnframt þarf að eiga virkt samtal um starfsmatskerfin og stöðu okkar fólks þar inni og endurnýjun stofnanasamninga.

Viska hefur hafið þessa vegferð en betur má ef duga skal. Hljóti ég kjör í stjórn Visku verður eitt af mínum meginmarkmiðum að styðja við þá vinnu og ýta undir að launasetning félagsfólks Visku sé byggð á málefnalegum grunni.